مرڪيم، ڪرڪيم، ڪونه ڏٺئي،

مرڪيم، ڪرڪيم، ڪونه ڏٺئي،
هاءِ بيٺم، ڏٺم، ڪونه ڏٺئي.

اس ۾ بڻجي مان آس جو پيرون،
بس، پڪتم، ڇڻيم، ڪونه ڏٺئي.

منهنجيون اکيون، منهنجا ڳوڙها،
ڳاڙيم، اگھيم، ڪونه ڏٺئي.

ٻارن جيان، چنبڙيم توکي،
رهڙيم، گھليم، ڪونه ڏٺئي.

سامهون تنهنجي تو جهڙو گيت،
لکيم، ڦاڙيم، ڪونه ڏٺئي.

(برڪت بلوچ)

مون ننڊ اڌاري ورتي آ ،

مون ننڊ اڌاري ورتي آ ،
تون خواب کڻي آ وڻجارا،
اي دل جي ڌڙڪن شور نه ڪر،
اي رات ذرا آهستي هل،
اي چنڊ ذرا چانڊوڪي جھل،
اي وڻ جون لامون خوب لڏو،
ڪو منظر ناڻن ۾ اُتري،
ڪو ويندڙ شايد موٽي پئي،
ڪو درد نڀاڳو وسري پئي،
من خواب ۾ اڄ دل ڀلجي پئي،
مون ننڊ اڌاري ورتي آ........
تون خواب کڻي آ وڻجارا.........

***

نامعلوم

گيت

هير گهلندي وڃي،
ماڪ پوندي وڃي،
رات ٺرندي وڃي،
ياد تنهنجي اچي،
ننڊ ڦٽندي وڃي،
ڇا ڪريان! ڇا ڪريان.

چنڊ ڏاڍو وڻي،
نيڻ مون ڏي کڻي،
هانءَ ۾ چڪ هڻي،
تانگهہ توڏي تڻي،
ڇا ڪريان...

ڳوٺ وارا سمهن،
کيت، ٻارا سمهن،
چنڊ، ٻارا سمهن،
ياد تنهنجي اچي،
سُور سارا اٿن،
ڇا ڪريان....

ڪانگ ڀت تي لنوي،
گرهه هٿ مان ڪري،
شل نه ڪا اک ڦري،
ياد تنهنجي اچي،
باهه ڀڙڪي ٻري،
ڇا ڪريان...

ساز وڄندا رهن،
گيت نچندا رهن،
درد دکندا رهن،
ياد تنهنجي اچي،
نيڻ ٽمندا رهن،
ڇا ڪريان...

ڇو نه عيدون اچن،
رنگ خوشيون رچن،
محب موجون مچن،
ياد تنهنجي اچي،
ساهه ٿڌڙا کڄن،
ڇا ڪريان، ڇا ڪريان ڇا ڪريان، ڇا ڪريان...

استاد بخاري

آزاد نظم

هن دريءَ جو نظاروڪر
ڏس نه ته پريان ريل پئي وڃي
ڪي مسافر کڻي
هڪ اڻڄاتل منزل طرف
هن ريل جو سفر ڪن ماڻهن لاءِ
ڪيڏو نه اهم آهي
ڪي عرصي کان پوءِ پنهنجن جو ديدار ڪندا
ڪي پنهنجي محبوب ڏانهن محبت جو پيغام کڻي ويندا
ته ڪي قبرن تي عقيدت جا گل رکڻ ويندا
ڇا تو هن ريل جي آواز ۾ ٿڌين آهون
۽ خاموش ڳوڙهن کي نه محسوس ڪيو؟
يا وري ڪنهن ٽرندڙ ڪليءَ جي خوشبو تو ڏانهن نه آئي !

*****
فقير عابد ديشي

تون ملندو رهندين خوابن ۾،

تون ملندو رهندين خوابن ۾، ڪو ڪيئن ٿو چوي، ڪو ڪيئن ٿو چوي.
ڪڏهن ننڊ ڪڏهن اوجاڳن ۾، ڪو ڪيئن ٿو چوي، ڪو ڪيئن ٿو چوي.

تون تہ ورڻو هئين وسڪارن ۾، ڇو نہ موٽئين ميگھ ملهارن ۾،
اک ڦرندي رهي ڦولارن ۾، دل سڙندي رهي سيلابن ۾.

ڏني ڪانگ نہ ٽپڪي ٽارين تي، ڪيا وار ورھ ويچارين تي،
توکي ڏسبو روز ديوارن تي، يا تہ پڙهبو ڪڏهن ڪتابن ۾.

اچ اکين وسي سيلاب ڪيا، اچ ڪڻڪن ۾ هن لاب پيا،
اڄ تائين نہ پورا خواب ٿيا، ڪيسين رهندين يار حجابن ۾.

ڪڏهن بيوس تنهنجا زخم اگھيا، ڪڏهن ڌرتي تنهنجا پار پڇيا،
اڄ پٿر بہ تنهنجا ڪين ٿيا، ڪڏهن ترندو هئين تون گلابن ۾.

****
تاجل بيوس

http://soundcloud.com/nyla-talpur/toon-ta-milando-rehndain